Tit 1 | NdeIBE | STEP | UPhawuli, inceku kaNkulunkulu lomphostoli kaJesu Khristu wokukholwa kwabakhethiweyo bakaNkulunkulu lokwazi iqiniso eliholela ekwesabeni uNkulunkulu

Titus 1

1 UPhawuli, inceku kaNkulunkulu lomphostoli kaJesu Khristu wokukholwa kwabakhethiweyo bakaNkulunkulu lokwazi iqiniso eliholela ekwesabeni uNkulunkulu – 2 ukukholwa lokwazi okweyame ethembeni lokuphila okulaphakade, okwathenjiswa nguNkulunkulu, ongaqambi manga, isikhathi singakaqalisi, 3 njalo ngesikhathi sakhe esimisiweyo wabonakalisa ilizwi lakhe ngentshumayelo engayiphathiswa ngomlayo kaNkulunkulu uMsindisi wethu.

4 KuThithusi, indodana yami ngokukholwa kwethu sonke: Umusa lokuthula okuvela kuNkulunkulu uBaba lakuKhristu uJesu uMsindisi wethu.

Umsebenzi kaThithusi eKhrethe

5 Engakutshiyela khona eKhrethe yikuthi uqondise lokho okwasala kungaphelanga ubeke labadala emizini yonke, njengokukulaya kwami.

6 Omdala kumele abe ngongasolekiyo, indoda elomfazi oyedwa, indoda elabantwana abakholwayo njalo abangelacala lobudlwangudlwangu loba ukwedelela.

7 Njengoba umbonisi ephathiswe umsebenzi ka-Nkulunkulu, kumele angabi lasici – angazikhukhumezi, ongazondi masinya, ongasiso sidakwa, ongathandi ukulwa, ongadingi inzuzo ngobuqili.

8 Kodwa kumele abe ngophatha kuhle izihambi, lowo othanda okuhle, ozikhuzayo, oqondileyo, ongcwele lozithibayo. 9 Kumele abambelele elizwini eliqotho njengokufundiswa kwalo ukuze akhuthaze abanye ngemfundiso eqotho, njalo amelane lalabo abaphikisayo.

10 Ngoba banengi abantu abahlamukayo, abakhulumayo nje kanye labakhohlisi, ikakhulu abeqembu lokusoka. 11 Kumele bathuliswe, ngoba bachitha imizi epheleleyo ngokufundisa izinto okungamelanga bazifundise – lokho bekwenzela inzuzo yenkohliso. 12 Lomunye wabaphrofethi babo wathi, “AbaseKhrethe bangabantu bamanga, izilo ezimbi, izihwaba ezingamavila.” 13 Ubufakazi lobu buliqiniso. Ngakho-ke bakhuze ngamandla, ukuze baqine ekukholweni 14 bangalaleli izinganekwana zamaJuda loba imilayo yalabo abadela iqiniso.

15 Kwabahlambulukileyo izinto zonke zihlambulukile, kodwa kulabo abaxhwalileyo njalo bengakholwa, akulalutho oluhlambulukileyo. Impela, kokubili izingqondo zabo lezazela zabo kuxhwalile. 16 Bathi uNkulunkulu bayamazi, kodwa ngezenzo zabo bayamphika. Bayenyanyeka, bayadelela njalo kabafanelanga ukwenza loba kuyini okuhle.